98 BEYYİNE SÛRESİ

98-сүрө “Баййина[1]”

Мединада түшүрүлгөн. Сегиз айаттан турат.

Мээримдүү, Ырайымдуу Алланын аты менен.

1.     Китеп ээлеринен[2] жана мушриктерден[3] болгон ишенбөөчүлөр өздөрүнө ачык-айкын кабарлар[4] келген кезге чейин, өз жаңылыштыктарынан[5] ажырай алышпады.

2.     Алладан келген элчи[6]  аларга таза кабарларды окуду (айтып берди).

3.     Аларда[7] туура өкүмдөр бар.

4.     Китеп ээлеринен болгондор[8] качан гана аларга ачык-айкын кабарлар[9] келген кезге чейин (бир-биринен) ажырашкан жок;

5.     Аларга чыныгы динди таза, бекем кармап, бир гана Аллага сыйынууга жана намаз окуп, зекетти (тиешелүү) орундарга берүүгө буйрук кылынды. Мына ушул гана – акыйкат жолунда адамдардын тутунган дини.

6.     Акыйкатта, Китеп ээлеринен жана мушриктерден чыккан ишенбөөчүлөр  - алар Тозоктун алоолонгон отунда түбөлүккө болушат. Алар - адамдардын эң жаманы.

7.     Акыйкатта, ыйман келтирип – Аллага ишенгендер жана жакшылык иштерди кылгандар, алар – адамдардын эң жакшысы.

8.     Аларга Жараткан тарабынан төмөн жактарында өзөн-дарыйалар агып турган бейиш бактары түбөлүккө сыйлык үчүн берилет. Алла Таала аларга ыраазы болот жана алар да Аллага ыраазы болушат. Бул[10] өз Жаратканынан корккон такыбалар үчүн гана.

---

[1] Байина – ачык-айкын кабар.

[2] Иудейлер жана христиандар.

[3] Көп кудайга сыйынгандар.

[4] Куран жана Ислам Пайгамбары

[5] Жаратканга шек келтирүүдөн.

[6] Мухаммед (а.с.).

[7] Китептерде.

[8] Иудейлер жана христиандар.

[9] Куран айаттары.

[10] Сыйлыктар.