95 TÎN SÛRESİ

95-сүрө “Тин[1]”

Меккеде түшүрүлгөн. Сегиз айаттан турат.

Мээримдүү, Ырайымдуу Алланын аты менен.

1.     Анжир менен зайтунга ант![2]

2.     Сиинаа тоосуна[3] ант!

3.     Мына ушул бейпил шаарга[4] ант!

4.     Албетте, Биз инсанды эң мыкты - тегиз турпатта кылып жараттык.

5.     Андан кийин Биз аны төмөнкүлөрдүн эң төмөнүнө кайтардык.[5]

6.     Бирок, ыйман келтирип Аллага ишенген жана жакшылык иштерди кылгандар үчүн үзүлбөгөн сыйлык бар.

7.     Мындан соң сени[6] кыйаматты жалганга чыгарууга эмне түрткү болуп жатат.  

8.     Алла өкүмдарлардын өкүмдары эмеспи?! 

---

[1] Тин – анжир.

[2] Эки жемиштин аталышы.  

[3] Сиинаа (Синай) тоосу — Муса (а.с.)га Тоорат түшкөн жер.

[4] Мекке шаарына.       

[5] Ошондой сымбаттуу келбет бергенден кийин ага шүгүр келтирбеген кезде алардын ишинин акыбети ылдый карай кетет, келбети бузулуп, кейпи кетет. Демек, алар тозокко түшүүчүлөр. Тафсир Ал-Насафий.

[6] Эй, инсан!